‘ஐ’ – மெர்சல் ஆக்கவில்லை

 ‘ரட்சகன்’ என்றொரு படம் வந்தது உங்களில் சிலருக்கு நினைவிருக்கலாம். அந்த படத்தின் இயக்குனர் பெயர் பிரவீன்காந்த் என்று நினைவு. அந்த படம் கிட்டத்தட்ட அந்த ஷங்கர் படங்களை அடியொற்றி பிரமாண்டமாக எடுக்கப்பட்டிருக்கும். இருந்தபோதும் வலுவான கதை இல்லாததால் படம் பெரிய வெற்றியை ஈட்ட முடியவில்லை. படத்தின் தயாரிப்பாளர் குஞ்சுமோனுக்கு  மிகப் பெரிய பாதிப்பையும் ஏற்படுத்தியது. சில வருடங்களுக்கு முன் அதே போல் பிரமாண்டமாக பணத்தை கொட்டி சுசி.கணேசன் ‘கந்தசாமி’ என்றொரு படம் எடுத்தார். பொறுமையை சோதிக்கும் திரைக்கதை. பெரிய அளவில் மார்கெட்டிங் செய்தும் படம் தேறவில்லை. படத்தின் இயக்குனர் அதன் பின் படம் எடுத்தது போல தெரியவல்லை.

பிரமாண்டம் மட்டுமே ஷங்கரின் வெற்றி சூத்திரம் என்பதாக வைத்து கொண்டால் மேலே கூறிய இரண்டு படங்களும் பெரிய வெற்றியை பெற்றிருக்க வேண்டும். ஆனால் பிரமாண்டம் என்பது மட்டுமே ஷங்கரின் வெற்றிக்கு காரணம் இல்லை. அழுத்தமான கதை, விறுவிறுப்பான திரைக்கதையே அவரின் படங்களின் வெற்றிக்கு காரணம். பிரமாண்டம் ஷங்கரின் அடையாளம் மட்டுமே. ஆனால் அதை அவர் வெற்றிக்கு காரணமாக புரிந்து கொண்டதால் ‘கந்தசாமி’யும், ‘ரட்சகன்’ னும் பெரிய அளவு பணத்தை விழுங்கி முதலுக்கு மோசம் விளைவித்தன.

‘ஐ’யை பொருத்தமட்டில்  இந்த முறை ஷங்கரே தன்னுடைய வெற்றியை தவறாக  புரிந்து கொண்டாரோ என்று சந்தேகம் எழுகிறது. கலர் கலராக காட்சிகளும், பிரமிக்க வைக்கும் விசுவல் எபக்ட்சம் இருந்தால் போதும் படம் ஓடி விடும் என்று நினைத்து விட்டாரோ என்னவோ. மிக சாதாரண கதையை எடுத்து கொண்டு படம் காட்டியுள்ளார். படத்தின் நீளம் வேறு பொறுமையை சோதிக்கிறது. படத்தின் கதை அப்படி ஒன்றும் மறைத்து வைக்க வேண்டிய கதை இல்லை. தன் உருவத்தை சிதைப்பவர்களின் உருவத்தை கதாநாயகன் சிதைத்து அவர்களை பழி வாங்குகிறார். கதை அவ்வளவுதான்.

விக்ரம் உழைப்பை கொட்டியுள்ளார்.  உடலை ஏற்றி, இறக்கி, உருமாற்றி அர்ப்பணிப்பு உணர்வு என்றால் என்ன என்று காட்டுகிறார். வேறு எந்த நடிகராலும் அந்த கதாபாத்திரத்தை செய்து விட முடியாது. உண்மையில் படம் பார்த்து கொண்டிருப்பவர்களுக்கே ஒரு பயம் வருகிறது. இப்படி எல்லாம் உடலை வருத்தி எதாவது ஆகி விடப் போகிறது என்று. வருடத்துக்கு மூன்று படம் நடித்து பணம் பார்ப்பதை விட்டுவிட்டு மூன்று ஆண்டுகளுக்கு ஒரு படம் என்று நடித்து கஷ்டப்பட்டு தன்னை வித்தியாசப்படுத்தி காட்டி கொள்ளும் விக்ரம் ஒரு ஆச்சரியம்.

எமி தமிழ் பெண் போலவே தெரிகிறார். வெள்ளைத்தோல் துருத்தி கொண்டு தெரியாமல் அழகாக இருக்கிறார். நடிப்பிலும் குறை இல்லை. சந்தானத்திற்கு சிரிக்க வைக்க அதிக வாய்ப்புகள் இல்லை. கிடைத்த வாய்ப்புகளில் தன்னுடைய  காமெடி செய்கிறார். ஆனாலும் பெரும்பாலான இடங்களில் முகம் சுளிக்க வைக்கும் வகையிலேயே காமெடி இருக்கிறது. இவர்களை தவிர வரும் ஐந்து வழக்கமான வில்லன்கள். நன்றாகவே வில்லத்தனம் செய்திருக்கிறார்கள்

அது எப்படி ஷங்கர் படங்களில் மட்டும் காட்சிகள் இத்தனை  அழகாக இருக்கிறது என்று தெரியவில்லை. சென்னை நகரின் அழுக்கு தெருக்களையும் அழகாக காட்டியுள்ளனர். சண்டை காட்சிகள் வித்தியாசம். ஆனால் மிக நீளம். பாடல் காட்சிகளில் வழக்கம் போல ஷங்கர் முத்திரை. ஆனால் பாடல்கள் இன்னும் நன்றாக இருந்திருக்கலாம். சில நேரங்களில்  சலிப்பை வர வைக்கின்றன. படத்திலேயே சில விளம்பரங்களையும் எடுத்து ஒரே கல்லில் இரண்டு மாங்காய் வீழ்த்தியது ஒரு புதுமை

ஷங்கர் ‘நண்பன்’ படத்தை ரீமேக் செய்ய கதை இல்லாததுதான் காரணமோ என்று இந்த படத்தை பார்த்தும் தோன்றியது. ட்விஸ்ட் என்று அமைத்த காட்சிகளும் எடுபடவில்லை. எல்லா ட்விஸ்ட்களும் எதிர்பார்த்ததுதான். வழக்கமாக ஷங்கர் படம் ஏற்படுத்தும் எந்த பாதிப்பையும் இந்த படம் ஏற்படுத்தவில்லை. பளபள காட்சிகளுக்காகவும், விக்ரமுக்காகவும் ஒரு முறை பார்க்கலாம். இரண்டாம் முறை பார்ப்பது கடினம். பொறுமை இழந்து விடுவோம்.

‘நாயக்’ ‘பாய்ஸ்’ என்று இரண்டு படங்கள் தோல்வி அடைந்த பின் ‘அந்நியன்’ எடுத்தார் ஷங்கர். படம் வெளிவந்த பின் ஒரு பேட்டியில் ‘அந்நியன்’ படத்துக்குத்தான் ஸ்க்ரிப்டுக்காக அதிகம் உழைத்தோம் என்று கூறி இருந்தார். அந்த படம் பார்க்கும்போது அது உண்மை என்றும் தோன்றியது. இப்போது சுஜாதாவும் இல்லாததால், அதை விட அதிக உழைப்பை அடுத்த படத்துக்கு ஷங்கர் கொட்டியே ஆக வேண்டும்.

இது விமர்சனம் இல்லை. இதை எழுதியவர் சினிமா மேதையும் இல்லை. படத்தை பார்க்கும்போது தோன்றிய எண்ணங்களின் தொகுப்பே இந்த கட்டுரை.

  

'நாய்கள் ஜாக்கிரதை’ - ஜாக்கிரதை!!!

பிடித்த படங்களை பற்றி மட்டுமே எழுத வேண்டும். அப்படி எழுதும் படங்களின் கதையை எழுதக்கூடாது என்பது எனது கொள்கை. படம் பிடிக்காவிட்டால் அந்த படத்தை பற்றி எதுவும் எழுதாமல் தவிர்த்து விடுவேன். இருந்த போதும் 'நாய்கள் ஜாக்கிரதை’ என்னை  கொள்கை மீற வைத்து விட்டது.

நூறு ரூபாய் கொடுத்து படத்துக்கு வந்ததே தவறோ என்று சில படங்கள் சிந்திக்க வைக்கும். அது போன்ற படங்களில், விறுவிறுப்பே இல்லாமல் மந்த கதியில் சென்று பார்ப்பவர்களின் பொறுமையை சோதிக்கும் ‘நீதானே என் பொன் வசந்தம்’ போன்ற படங்கள் ஒரு வகை. லாஜிக் எல்லாம் தேவையில்லை. படம் என்று ஏதோ ஒன்றை எடுத்து வைப்போம் என்ற ரீதியில் படம் எடுத்து பார்ப்பவர்களின் காதில் பூ வைக்க முயன்று தோற்கும்  ‘நாய்கள் ஜாக்கிரதை’ வகை படங்கள் இன்னொரு வகை.

படம் முதல் பாதியில் எல்லாம் நன்றாகத்தான் செல்கிறது. போலீஸ்காரர் சிபி பெண்களை கடத்தும் கும்பலுடன் மோதுகிறார். அந்த சண்டையில் தன்னுடைய போலீஸ் நண்பரை இழக்கிறார். அந்த சண்டையில் அவர் காலிலும் குண்டடிபட்டு விடுவதால் விடுப்பில் இருக்கிறார். அந்த நேரத்தில் ஒரு நாயுடன் பழக்கம் ஏற்பட அந்த நாயை செல்லப்பிராணியாக்கி கொள்கிறார். இவை எல்லாம் நடந்து முடியும்போது சிபிராஜின் மனைவி அந்த பெண் கடத்தல் கும்பலால் கடத்தப்படுகிறார். இடைவேளை  விடுகின்றனர். இதுவரை படம் பரவாயில்லை ரகம்தான்.

இடைவேளைக்கு பின்னர்  கிளைமாக்ஸ் ஆரம்பித்து விடுகிறது. படமும் நொண்டியடிக்க ஆரம்பித்துவிடுகிறது. கடத்தல் கும்பல்  சிபிராஜின் மனைவியை சவப் பெட்டியில் வைத்து குழி தோண்டி புடைத்து விடுகின்றனர். பெட்டியில் அவரின் மனைவி படும் கஷ்டத்தை சிபிக்கு நேரடி ஒளிபரப்பு செய்கின்றனர். இனி சிபிராஜ் அந்த நாயுடன் சேர்ந்து எப்படி தனது மனைவியை கண்டுபிடிக்கிறார் என்பதே மீதிக்கதை.

கதை நன்றாக இருப்பது போல்தான் தெரியும். ஆனால் சிபி தன்னுடைய மனைவியை தேடும்  காட்சிகள் அபாரம்

• மனைவி மண்ணுக்குள் இருக்கும்போது சிபிராஜ்  துளி பதட்டமும் சோகமும் இன்றி இருக்கிறார். அந்த ஹீரோயினுக்காக எல்லாம் சோகமாக இருக்க தேவையில்லை என்று நினைத்து விட்டாரோ என்னவோ.

• மண்ணுக்குள் புதைத்து வைத்த பெட்டிக்குள் மழை நீர் இறங்குகிறது.

• ஊட்டியில் மழை பெய்வது தெரிந்து சிபிராஜ்  ஊட்டியில் மனைவியை தேடி திரிகிறார். ஆனால் ஊட்டியில் மழை பெய்த அறிகுறியே எங்கும் இல்லை.  

• நாய்க்கு வெறி பிடித்து விட்டது என்று மயக்க ஊசி போடுகின்றனர். ஆனால் மயங்கிய  நாயை பிடித்து அடைத்து வைக்காமல் அவரவர் வேலையை பார்க்க சென்று விடுகின்றனர்.

• ஆறு மணிநேரம் பெட்டிக்குள் இருந்த கதாநாயகி ஏதோ தூங்கி விழிப்பதை போல எழுந்து நடந்து நடந்து செல்கிறார்.

• சிபி நன்றாகத்தானே துள்ளி குதித்து நடக்கிறார். பின்னர் ஏன் காலில் கட்டு

மேலே சொன்னவை எல்லாம் சிறு துளிதான். லாஜிக் மீறாமல் எல்லாம் யதார்த்த படம் எடுக்க முடியாதுதான். இருந்தாலும் அதற்காக காட்சிக்கு காட்சியா லாஜிக் இல்லாமல் படம் எடுப்பது. நல்ல சினிமா விமர்சகர்கள் படத்தை பிரித்து எடுத்து விடுவார்கள். மகனுக்காக படம் எடுப்பது என்று முடிவு செய்த சத்தியராஜ் இன்னும்  நன்று அறிமுகமான நடிகர்களை முக்கிய வேடங்களில் நடிக்க வைத்து இருக்கலாம். படம் முடிந்தபின்  ஹீரோ போல முன்னிறுத்தப்பட்ட அந்த நாயும் மனதில் பதியவில்லை. படமும் கூட.

கோச்சடையான் – சில கருத்துகள் மட்டும்

கோச்சடையான் வெளிவந்து பத்து நாட்களுக்கும் மேல் ஆகிவிட்டது. இரண்டாம் நாளே படம் பார்த்து விட்டேன். இதற்கு மேல் படத்தை பற்றி எழுத வேண்டுமா என்ற எண்ணம் தோன்றினாலும் படத்தின் ட்ரைலர், பாடல்கள் பற்றி எல்லாம்  எழுதிய பின்பு படத்தை பற்றி எழுதவில்லை என்றால் ஒரு குறையாகவே இருக்கும் என்பதால் எழுதுகிறேன்.

படம் சூப்பர்பா, ரஜினி குரல் மட்டுமே போதும், ரவிக்குமார் கதை சூப்பர், ரஹ்மான் மியூசிக் என்னமா இருக்கு, நாகேஷ் அருமை  என நல்ல விதமான விமர்சனங்களும் ஏன் நடக்கும்போது எல்லோரோட காலும் வளைஞ்சு இருக்கு, ரஜினி பல்லை நல்லா காட்டி இருக்கலாம், தீபிகா படுகோன் மூஞ்சி படு கோணையா இருக்கு, சரத்குமார் எந்த கேரக்டர்ல வராருன்னே கண்டுபிடிக்க முடியல, தொட்டதுக்கெல்லாம் பாட்டு, கார்ட்டூன் நெட்வொர்க்ல கூட இத விட நல்லா அனிமேஷன் படம் போடுவாங்க, இதை மட்டும் லைவ் ஆக்சன்ல எடுத்து இருந்தா பிச்சுகிட்டு ஓடி இருக்கும் இப்போ சுமார்தான்  என்று நெகடிவ் விமர்சனங்களும் இன்று வரை  வந்து கொண்டே இருக்கின்றன.  இப்படி ஒரு படம் வந்து இத்தனை நாளுக்கு பின்னும் நம்மால் விவாதிக்கப்படுகிறது என்றால் அது ரஜினி படமாக மட்டுமே இருக்க முடியும். பொம்மை படம் என்று யாராலும் எளிதில் ஒதுக்கித் தள்ளி விட்டு சென்று விட முடியவில்லை. அந்த வகையில் கோச்சடையான் சந்திரமுகி, எந்திரன் போல வெற்றி படமே.

படம் ஹாலிவுட் தரத்தில் இல்லை என்று சொன்னாலும் ஒரு சில விஷயங்கள் கவனிக்கப்பட வேண்டும். இந்த படத்தை கிட்டத்தட்ட ஒரு பரிசோதனை முயற்சி என்று கொள்ளலாம். காரணம் படத்தின் சில காட்சிகளில் கதாபாத்திரங்களின் உருவங்களும், அசைவுகளும் தத்ரூபமாகவும் சில காட்சிகளில் அமெச்சூர்தனமாகவும் இருப்பதுதான். படத்தின் இரண்டாம் பாதியில் வரும் காட்சிகள், முதல் பாதியில் வரும் காட்சிகளை விட நன்றாக வடிவமைக்கப்பட்டு இருந்தன. குறிப்பாக சொல்ல வேண்டுமென்றால் தீபிகாவின் முகம்  சில காட்சிகளில் நன்றாகவும், சில காட்சிகளில் மிக வித்தியாசமாகவும் இருப்பதை கவனித்தால் உணரலாம். அதே போல  இறுதிக்காட்சியில் வரும் சேனாவின் முகம் ராணா,கோச்சடையான் முகத்தை விட சிறப்பாக வடிவமைக்கப்பட்டிருந்தது. இரண்டாம் பாகம் எடுக்கும் பட்சத்தில் முதல் பாகத்தின்  தவறுகளை அவர்களின் அனுபவம் திருத்தி இருக்கும் என நம்பலாம். ஆனால் அப்போதும் தமிழ் சினிமா பட்ஜெட்டில் ஹாலிவுட் தரம் எல்லாம் சாத்தியம் இல்லை. சரி, பின்னர் எதற்கு இப்படி படம் எடுக்க வேண்டும் என்று யோசித்தால் கிடைக்கும் பதில், நம்ம ஊரில்தான் நாடகம் இருக்கிறதே பின்னர் எதற்கு சினிமா என்று ‘கீசக வதம்’ எடுக்கும்போது யோசித்து இருந்திருந்தால் இன்று தமிழ் சினிமாவே இருந்திருக்காது.

படம் பார்க்கும்போது தோன்றிய இன்னொரு விஷயம் ரஜினிக்கு படையப்பா பாணியில் பில்டப் காட்சிகள் வைத்து இருக்கலாம் என்பது. ஆனால் இத்தனை செலவு பிடிக்கும் முறையில் கதைக்கு தேவை இல்லாத காட்சிகளை திரைக்கதையில் கொண்டு வருவது சாத்தியம் அல்ல என்று பின்னர் தோன்றியது. படம் தொடங்கியது முதல் இறுதிவரை கதையில் மட்டுமே பயணிப்பதால் மட்டுமே இது சிறந்த திரைக்கதை என்று பாராட்டப்படுகிறது. இந்த திரைக்கதை மற்ற தொழில்நுட்ப குறைபாடுகளை மறக்க செய்து விடுகிறது. நடிப்பு பதிவாக்க முறையில் இருக்கும் ஒரு பிரச்சினையே படத்துக்கு ஒரு வகையில் பலமாகிவிட்டது.

ஒட்டுமொத்தமாக பார்க்கும்போது தமிழுக்கு ஒரு புதிய தொழில்நுட்பத்தை அறிமுகப்படுத்திவிட்டார்கள் நல்ல முன்னெடுப்பு என்று தோன்றினாலும் இன்றைய சூழ்நிலையில் ரஜினியை தவிர மற்ற யாரை வைத்தும் இந்த தொழில்நுட்பத்தில் படம் எடுத்து விட முடியாது. ஏனென்றால் ரஜினி தவிர வேறு யாரால் குரல்  மட்டும் கொடுத்து நூறு கோடிக்கு மேல் வசூலை  குவிக்க முடியும்? பின்னர் மற்றவர்களுக்கு இந்த புதிய தொழில் நுட்பத்தின் பயன்தான் என்ன? காலம் மட்டுமே பதில் சொல்ல முடியும். 

யாமிருக்க பயமே - கட்டாயம் பாருங்க

தமிழில் பேய் படங்கள் வருவது இப்போது  மிகவும் குறைந்து விட்டது. 13ம் நம்பர் வீடு, உருவம் போன்ற மாதிரியான படங்களை தமிழில் இப்போது  யாரும் எடுக்காமல் தமிழ் பேய் பட ரசிகர்கள் ஹாலிவுட் படங்களை பார்த்து சந்தோசப்பட்டு கொள்ள வேண்டிய நிலை. காமெடி படங்கள் மட்டும்தான் ஓடும் என்றால் யார்தான்  பேய் படம் எடுப்பார்கள். அபூர்வமாக அவ்வப்போது ‘காஞ்சனா’ போன்ற படங்கள் வெளிவந்தாலும் ஓட்டு மொத்தமாக வெளி வரும் பேய் படங்களின் எண்ணிக்கை மிகவும் குறைவு. இந்த சூழ்நிலையில் காமெடியையும், பயத்தையும் கலந்து கொடுத்து காட்சிக்கு காட்சி ரசிகர்களுக்கு புது அனுபவம் குடுக்கும் படமாக வந்துள்ளது ‘யாமிருக்க பயமே’   

கதாநாயகனுக்கு எதிர்பாராத வகையில் பங்களா ஒன்று கிடைக்கிறது. அவர் அந்த  பங்களாவுக்கு குடி புகுந்ததும் நடக்கும் சம்பவங்களை நிறைய காமெடி, கொஞ்சம் பயம், கொஞ்சம் சஸ்பென்ஸ், கொஞ்சம் கவர்ச்சி  என்று சரியான விகிதத்தில் கலந்து கொடுத்து இருக்கிறார்கள். படம் ஆரம்பித்ததில் இருந்து முடியும் வரை திரையரங்கில் அனைவரும் சிரித்து கொண்டே இருக்கிறார்கள். டைட்டிலில் இருந்து படம் முடியும் வரை எல்லாமே புதிதாக இருக்கிறது (குறைந்தபட்சம் தமிழ் படம் மட்டும் பார்ப்பவர்களுக்கு)

கதையில் குறைகளே இல்லையா என்று கேட்டால் நிறைய சொல்லலாம்தான். ஆனால் காமெடி படத்திலும், பேய் படத்திலும் லாஜிக் எதற்கு பார்க்க வேண்டும். கொடுத்த  காசுக்கு படம் திருப்தியாக இருக்கிறது அவ்வளவுதான். இரட்டை அர்த்த வசனங்களை கொஞ்சம் குறைத்து கொண்டிருந்தால் குடும்பத்துடன் பார்க்க வேண்டிய படம் என்று சொல்லி விடலாம். இப்போதைக்கு  இது பார்க்க வேண்டிய படம் என்று மட்டும் சொல்லிக் கொள்கிறேன்.

நாட் சோ அமேசிங் ஸ்பைடர்மேன் - 2

ஸ்பைடர்மேன் படங்களின் மேல் எப்போதும் எனக்கு விருப்பம் அதிகம். காரணம் ஸ்பைடர்மேன் படங்களில் ஆக்சன், செண்டிமெண்ட், காதல் என்று சரியான விகிதத்தில் கலந்து கிட்டத்தட்ட ஒரு கமர்ஷியல் தமிழ் படம் போலவே கொடுத்து இருப்பார்கள். ஸ்பைடர்மேன் முதல் மற்றும் இரண்டாம் பாகங்கள் விறுவிறுப்பு. மூன்றாம்  பாகம் சற்று சொதப்பல்தான்.

ஸ்பைடர்மேன் மூன்று பாகங்களுக்கு பின்  ஸ்பைடர்மேனை அமேசிங் ஸ்பைடர்மேனாக மாற்றி எடுத்து வெளியிட்டார்கள். முதல் பாகம் எந்த குறையும் இல்லை. ஆனால் தற்போது வெளி வந்து இருக்கும் இரண்டாம் பாகம் சற்று ஏமாற்றம்தான். ஸ்பைடர்மேனின் பெற்றோர்கள், ஆஸ்கார்ப் நிறுவனத்தில் நடக்கும் சதி செயல்கள் என்று கதை சென்றாலும் ஒரு சராசரி ‘B’ சென்ட்டர் ரசிகனை திருப்திபடுத்துமாறு படம் இல்லை.

ஸ்பைடர்மேன் படங்களின் உண்மையான ஹீரோ வில்லன்தான். வில்லன் வலுவாக இருந்தால்தான் ஸ்பைடர்மேனால் தன்னுடைய முழு பலத்தையும்  காட்டி சண்டையிட முடியும். ஆனால் இந்த பாகத்தில் ஒரு விபத்தில் மின்சாரத்தை பாய்ச்சும்/தேக்கும்  சக்தி வரப் பெற்ற  வில்லன் அத்தனை எடுபடவில்லை. வழக்கமாக ஸ்பைடர்மேன் படங்களில் வில்லன்கள் எதிர்பாராத நேரத்தில் நகரத்தை தாக்குவார்கள். ஆனால் இந்த படத்தில் எப்போதெல்லாம் வில்லன் நகரத்தை தாக்குவான் என்று எளிதில் கணித்து விட முடிகிறது. எப்போதெல்லாம் ஸ்பைடி தன் காதலியை நெருங்குகிறாரோ அப்போதெல்லாம் வில்லன் வருவான் என்று நினைக்கிறோம். சொல்லிவைத்தார் போல வில்லனும் வந்து விடுகிறான். பெரிய பெரிய வில்லன்களை  ஊதி தள்ளிய ஸ்பைடி அவனை எளிதில் தோற்கடித்து விடுகிறார்.

படம் முடியும் நேரத்தில் ஸ்பைடியின் நண்பன் வில்லனாக மாறி ஸ்பைடியை அழிக்க கிளம்புகிறார். அந்த வில்லனும் சப்பையாக போய் விட எல்லா எதிர்பார்ப்பும் புஸ்சென்று போய் விடுகிறது. இருந்தாலும் இந்த வில்லன்களுடன் நடக்கும் சண்டையில் ஸ்பைடி தனது காதலியை இழந்து மனச் சோர்வுக்கு ஆளாகிறார். ஸ்பைடியின் நண்பன் அவரை அழிக்க அடியாட்களை தயார் செய்து அனுப்புகிறார். ஸ்பைடி அவர்களுள் ஒரு அடியாளுடன் மோதப் போகும்போது படத்தை முடித்து விடுகிறார்கள்.

மிகுந்த எதிர்பார்ப்புடன் வெளிவந்திருக்கும் இந்த ‘அமேசிங் ஸ்பைடர்மேன் 2’ நிஜத்தில் அமேசிங்காக இல்லை. குழந்தைகளுக்கு போர் அடிக்கும். வழக்கப்படி தொழில்நுட்ப ரீதியில் வலுவாக இருந்தாலும் கதையும் திரைக்கதையும் வலுவில்லாமல்  போய் விட்டது. அமெரிக்கர்களுக்கு ஓர் வேளை படம் பிடித்து இருந்தாலும் டப்பிங்கில் பார்க்கும்  தமிழர்களுக்கு  இது ஒரு சராசரி படம்தான். இருந்தாலும் ஸ்பைடர்மேன் ரசிகர்கள் படத்தை ஒரு முறை பார்க்கலாம்.

கோச்சடையான் ட்ரைலர் மற்றும் பாடல்கள் – ஒரு பார்வை

சில  நாட்களுக்கு முன் வெளிவந்த கோச்சடையான் டீசரை பார்த்தபோது ஏமாற்றமாக இருந்தது. இத்தனை செலவு செய்து இத்தனை சாதாரணமாக படத்தை எடுத்து விட்டார்களே என்று. அந்த எண்ணத்தை தவிடுபொடியாக்கி விட்டது இப்போது வெளிவந்துள்ள ட்ரெய்லர்.

ட்ரெய்லரின்  ஒவ்வொரு ப்ரேமிலும் படக்குழுவினரின் கடின உழைப்பு தெரிகிறது. அனிமேஷன் ரஜினியின் உடல்மொழி தத்ரூபமாக இல்லாவிட்டாலும் திருப்திகரமாகவே உள்ளது. ஆனால் பெரிய குறை ரஜினியின் முகவெட்டு. ரஜினியின் முகத்தை வடிவமைக்க இன்னும் சற்று மெனக்கெட்டு இருக்கலாம். அதே போலதான் ட்ரெய்லரில் வரும் மற்ற ஆண்களின் முகங்களும். சற்று சிரமப்பட்டுதான் நாசரை அடையாளம் காண முடிகிறது. ஆனால் ஆது என்ன மாயமோ பெண்களின் முகங்கள் அத்தனை துல்லியமாக வடிவமைக்கப்பட்டுள்ளது. தீபிகா, ஷோபனா, ருக்மிணி என்று அத்தனை அனைவரின் தோற்றமும் அத்தனை இயல்பாக வழக்கமான படங்களில் பார்ப்பது போல. மனிதர்களை போலவே கழுதைப்புலிகள், டால்பின்கள், குதிரைகள் என்று மற்ற விலங்குகளையும் நன்றாகவே காட்சிப்படுத்தி உள்ளனர். ஒவ்வொரு காட்சியிலும் பிரம்மாண்டம். 

அதே நேரத்தில்  ஒவ்வொரு காட்சியிலும் முன்னணி கதாபாத்திரங்களை காண்பிப்பதில் எடுத்த சிரத்தையில் சிறிதளவு துணை கதாபாத்திரங்களை காண்பிப்பதிலும் எடுத்து இருக்கலாம். ஒரு காட்சியில் ரஜினியின் பின் நிற்கும் பணிப்பெண்கள் performance capturing செய்யப்பட்டவர்கள் போல இல்லாமல் பொம்மை போல தெரிகின்றனர். ரஜினியின் தாண்டவ காட்சியில் பின்னால் நிற்கும் மக்கள் வட இந்தியர்களை போல உடை அணிந்து இருப்பதன் காரணம் கதையா? அல்லது  கவனப்பிசகாக செய்ததா என்பது படம் பார்த்தால் தெரிய வரலாம். இது போன்ற விஷயங்கள் சிறியது போல தெரிந்தாலும் இவைதான் ‘டின்டின்’ போன்ற படங்களையும் இந்த படத்தையும் வேறுபடுத்து காண்பிப்பவை. ‘டின்டின்’ படத்தில் கதாபாத்திரங்களின் நிழல் தலைமுடி காற்றில் அசைவது போன்றவை கூட மிகுந்த சிரத்தை எடுத்து காண்பிக்கப்பட்டு இருக்கும். இருந்தாலும் நமக்கு  இருக்கும் பட்ஜெட்டுக்கு இத்தனை செய்து இருப்பதே பெரிய விஷயம்.

ட்ரைலர் பார்க்க இங்கே கிளிக் செய்யவும். youtube சென்ற பின் 720 HD தரத்தில் காண்க, 

பாடல்களை பொறுத்தவரை A.R,ரஹ்மான் எந்த குறையும் வைக்கவில்லை. அதே போல வைரமுத்துவும். உண்மையை சொன்னால் தன்னுடைய பாடல் வரிகளில் ரஹ்மானின் இசையையே மிஞ்சி விடுகிறார். வைரமுத்துவின் வார்த்தைகளை அமுக்காமல் இசை அமைத்த ரஹ்மானுக்கு நன்றி. அத்தனை பாடல்களும் கால இயந்திரத்தில் பின்னோக்கி இழுத்து சென்று விடுகின்றன.

‘காதல் கணவா’ பாடலில் லதா ரஜினியின் குரலில் அத்தனை வசீகரம்.

ரஜினி வரிகளை வாசிக்கும்  ‘’மாற்றம் ஒன்றுதான்’ பாடல்  அருமை.

‘எங்கள் கோச்சடையான்’ பாடல் இசையில்  பிரமாண்டம்.

‘மெதுவாகத்தான்’, ‘இதயம்’ பாடல்கள்  மெல்லிசையில் ஈர்க்கின்றன.

‘கர்ம வீரன்’ பாடலும் கேட்க நன்றாகவே உள்ளது.

ட்ரெய்லரில் பார்த்தவரை K.S.ரவிக்குமாரின் திரைக்கதையும், ரஹ்மானின் இசையும்  ரசிகர்களை கவர்ந்து விடும் என்றே தோன்றுகிறது. இருந்தாலும் இந்த புது முயற்சியை ரசிகர்கள் ஏற்று கொள்வார்களா? படத்தில் வரும் உருவத்தை ரஜினியாக ஒத்து கொள்வார்களா என்பதை மில்லியன் டாலர் கேள்வி. ஆனால் அந்த உருவத்தை ஏற்று கொண்டாலும் ஏற்று கொள்ளாவிட்டாலும் ரஜினியின் குரலுக்காகவே படத்தை குறைந்தது மூன்று முறை பார்ப்பார்கள் . ஏனென்றால் அவர்கள்தான் ரஜினி ரசிகர்கள்.

ஓநாயும், ஆட்டு குட்டியும் - மிஷ்கின் முத்திரை

சினிமா என்பது ஒரு மொழி. அந்த மொழியை சாதாரணமான  பேச்சு வழக்குக்கும் பயன்படுத்தலாம்;  அதை பயன்படுத்தி அழகாக கவிதைகளும்  எழுதலாம். மிஷ்கின் வழக்கமாக கவிதை எழுத முயற்சிப்பவர். நேர்த்தியான காட்சி அமைப்புகள், வித்தியாசமான கேமரா கோணங்கள், இயல்பான நடிப்பை தரும் நடிகர்கள், மயங்க வைக்கும் பின்னணி இசை என ஒவ்வொரு பிரேமையும் ரசித்து ரசித்து செதுக்கி உள்ளார் தன்னுடைய   ஓநாயையும் ஆட்டு குட்டியையும்.

படத்தின் கதை மிக சாதாரண திருடன், போலீஸ் கதைதான். சாலையில் குண்டு  அடிபட்டு கிடக்கும் ஒருவனுக்கு மருத்துவ கல்லூரி மாணவன் ஒருவன் உதவுகிறான். காப்பற்றப்பட்ட மனிதன் தப்பி ஓடிய பின்னரே தான் உதவியது ஒரு கொலைகாரனுக்கு என்று அந்த மாணவனுக்கு  தெரிகிறது. தப்பி ஓடிய கொலைகாரனை பிடிக்க வைக்கப்பட்ட பொறியில்  காவல்துறை அந்த மாணவனையே ஆட்டு குட்டியாக பயன்படுத்துகிறது. பொறியில் ஓநாய் சிக்கியதா? ஆட்டுக்குட்டி என்ன ஆனது? என்பதே மீதி கதை.

இந்த கதையை படத்தை மிஷ்கின்  காட்சிப்படுத்தி இருக்கும் விதம்தான் படத்தை சிறந்த படங்களின் வரிசையில் சேர வைக்கிறது. பிரேமை விட்டு நடிகர்கள் விலகிய பின்னரும் அசையாத கேமரா, சீரியசான காட்சிகளுக்கு நடுவில் வரும் மெல்லிய நகைச்சுவை என படம் நெடுக மிஷ்கின் முத்திரை. படத்தின் முக்கிய பலம் இளையராஜா. எத்தனை வயது ஆனாலும் ராஜா ராஜாதான் என்று நிருபித்துள்ளார். நடிகர்கள் ஒவ்வொருவரும் தங்கள் கதாபாத்திரத்தை உணர்ந்து சிறப்பாக செய்துள்ளனர். படத்தின் நிறைகள், குறைகளை முற்றிலும் மறைத்து விடுகின்றன

'ஒரு கல் ஒரு கண்ணாடி', 'தீயா வேலை செய்யணும் குமாரு' போன்ற படங்களை மக்கள் விரும்பும் இந்த நேரத்தில் இந்த படம் ஓடுமா என்று தெரியவில்லை. ஆனால் ஓடினால்தான் தமிழ் சினிமாவுக்கு நல்லது. எது எப்படியானாலும் இந்த படத்தின் மூலம் தமிழ் சினிமாவின் சிறந்த இயக்குனர்கள் வரிசையில் மிஸ்கின் இடம் பிடித்து விட்டார்.

கோச்சடையான் - சில எண்ணங்கள்

எனக்கு ரஜினியை எந்த வயதிலிருந்து பிடிக்க ஆரம்பித்தது என்று சரியாக நினைவில்லை.குழந்தை பருவத்திலிருந்தே நான் ரஜினி ரசிகன் ஆகி விட்டேன். சிறிய வயதில் என்னை  வசீகரித்த எத்தனையோ விஷயங்கள் நாளடைவில் சாதாரண விஷயங்கள் ஆகிவிட்டன. ஆனால் ரஜினி மீதான ஈர்ப்பு மட்டும் வயது ஏற ஏற அதிகரித்ததே தவிர சிறிதும் குறையவில்லை. அதுதான் ரஜினி மேஜிக். படம் பார்க்க வருபவர்களை தன்னை நோக்கி ஈர்த்து கொள்ளும் காந்தம் அவர்.

'சிவாஜி' படம் வெளிவந்த போது ரஜினி மாநில எல்லைகளை கடந்து ஒட்டு மொத்த இந்தியாவுக்கும் சூப்பர் ஸ்டார் ஆகி போனார். அந்த படம் தயாரிப்பில் இருந்த நேரம் 'சுல்தான் தி வாரியர்' என்ற அனிமேஷன் படத்தை சௌந்தர்யா ரஜினிகாந்த்  இயக்கி கொண்டிருந்தார். அந்த படத்தின் டீசர் 'சிவாஜி' படத்தோடு  வெளியிடப்பட்டது. உண்மையிலேயே அந்த டீசர் அற்புதமாக வடிவமைக்கப்பட்டிருந்தது. ரஜினி போன்ற உருவம் கொண்ட ஒரு பொம்மையே சினிமாவின் வசூல் சாதனைகள் அனைத்தையும் முறியடிக்க போகிறது என்று எண்ணி கொண்டேன். 'சிவாஜி' ஜூரம் ஒட்டு மொத்த தேசத்திலும் அடித்து கொண்டிருந்த அந்த நாளில் அந்த படம் வெளிவந்து இருந்தால் அதுதான் நடந்து இருக்கும்.

இப்படி அதிரடியாக ஆரம்பிக்கப்பட்ட 'சுல்தான்' பின்னாளில் எதனால் கைவிடப்பட்டது என்று தெரியவில்லை. சௌந்தர்யா படம் தயாரித்து நஷ்டம் அடைந்தது ஒரு காரணமாக இருக்கலாம். அல்லது வேறு சில  காரணங்களும் இருக்கலாம். சௌந்தர்யா படம் எடுத்து பட்ட கடன்களை அடைத்த ரஜினி அவருக்கு திருமணம்  முடித்து வைத்தார். இந்த நிலையில் சுல்தானை ஏறக்குறைய எல்லாரும் மறந்தே விட்டனர். 

ரஜினியின் உடல் நல குறைவுக்கு பின் 'கோச்சடையான்' என்று மீண்டும் ஒரு அனிமேஷன் படம் ஆரம்பித்தனர். சரி, சுல்தானை தூசி தட்டுகிறார்கள் போலும் என்று நினைத்தேன். ஆனால் இந்த படத்துக்கும் சுல்தானுக்கும் சம்பந்தம் இல்லை என்று சௌந்தர்யா பேட்டி கொடுத்தார். எது எப்படி இருந்தால் என்ன ,தலைவர் படம் வந்தால் போதும் என்று எண்ணி கொண்டேன். படம் விறுவிறுப்பாக தயாரானது. ரஜினி நடனமாடும் அட்டகாசமான ஸ்டில் வேறு வெளியானது. K.S. ரவிகுமார் படத்தில் இணைந்து கொண்டதும் எனது எதிர்பார்ப்பு அதிகமானது. 'ஜீன்ஸ்' ராஜு சுந்தரம் போலி ஐஸ்வர்யா ராயை ஆட்டுவிப்பது போல, 'கோச்சடையான்' நடிகர்கள் அனைவரும் உடலில் இறுக்கமான ஆடை அணிந்து கொண்டு தங்கள் 3டி மாதிரிக்கு உயிர் கொடுக்கும் மேகிங் வீடியோ பார்த்ததும் எதிர்பார்ப்பு உச்சத்திற்கு போனது.

 

ரஜினி கடந்த ஆண்டு தீபாவளிக்கு படம் வெளிவரும் என்று பேட்டி கொடுத்தார். தயாரிப்பு நிறுவனமோ தீபாவளிக்கும் முன்னரே படம் வெளிவரும் என்றது. ஆனால் எதிர்பார்த்தது போல் எதுவும் நடக்கவில்லை. ஆண்டு ஒன்று ஓடிப்போனது. ரஜினிக்கு படத்தில் திருப்தி இல்லை; படம் கைவிடப்பட்டு விட்டது என பேச்சு எழ தொடங்கியது. ஆனால் விநாயகர் சதுர்த்தி அன்று டீசர் வெளியிடப்படும் என்று அறிவிக்கப்பட்டதும் வதந்திகள் அடங்கி விட்டன. சொன்னபடி டீசரும் வெளியானது.

கடந்த திங்கள் அன்று ஆவலோடு முதல் முறையாக டீசர் பார்க்க ஆரம்பித்தவனுக்கு அதிர்ச்சி. டீசர் 'சுல்தான்' பட டீசரை விட மோசமாக தெரிந்தது. என்ன காட்சிகள் ஓடுகிறது என்றே புரியவில்லை. இந்த தரத்தில் படம் எடுக்கவா இதற்கா இத்தனை நாட்கள் என திகைத்தேன். ஒரு வேளை கேன்ஸில் ரஜினி படத்தின் ட்ரைலரை வெளியிட விடாமல் தடுக்க இதுதான் காரணமோ என எண்ணினேன். அப்போதுதான் யூ ட்யூபில் இருந்த அந்த கமெண்டை கவனித்தேன்.

டீசரை 1080 hd தரத்தில் பார்க்கவும் என்று பரிந்துரைத்து இருந்தது அந்த கமெண்ட். அங்கே குறிப்பிட்டு இருந்தபடி வீடியோ  குவாலிட்டி மாற்றி பார்த்த பின்தான் மனம் ஓரளவு ஆறுதல் அடைந்தது. உண்மையிலேயே படத்திற்காக நிறைய மெனக்கெட்டு உள்ளனர். சில காட்சிகள் நன்றாகவே உள்ளன. ஒரே ஒரு குறை ரஜினியின் முகத்தை இன்னும் சற்று துல்லியமாக வடிவமைத்து இருக்கலாம். தந்தை ரஜினியின் முகம் ரஜினி போலவே இல்லை. மகன் ரஜினியின் முகமோ உடலை விட்டு வித்தியாசமாக, ஒட்டப்பட்டது போல தெரிகிறது. ரஜினியின் முகத்தை மட்டும் துல்லியமாக வடிவமைத்து இருந்தால் அது மற்ற எல்லா குறைகளையும் மறைத்து இருக்கும். ரஜினியின் முகத்துக்காக படம் பார்க்க வருபவர்கள்தானே அதிகம்.

இந்த டீசரை பார்த்து பலர் இந்த படம் தோல்வி அடையும் என்று சிலர்  கணித்து இருப்பார்கள். ஆனால் எனக்கு என்னவோ இந்த படம் சூப்பர் ஹிட் ஆகும் என்று தோன்றுகிறது. ஒரு வேளை மெகா ஹிட் ஆனாலும் ஆகலாம். ஏனெனில் எதையும் நடத்தி காட்டுவதுதானே ரஜினி மேஜிக்.

http://www.youtube.com/watch?v=kyt_V_UZfvI

 

சிங்கம் II - itz சிங்கம் டான்ஸ்

கதை முன்னுரை :

 உங்களில் சிலருக்கு 'சிங்கம்' முதல் பாகத்தின் இறுதி காட்சி நினைவில் இருக்கலாம். அதில் காட்டியபடி வேலையை விடுவது போல நாடகமாடி தூத்துக்குடியில் நடக்கும் ஆயுத கடத்தலை கண்டுபிடிக்க களம் இறங்குகிறார் சூர்யா. ஆனால் தன் பழைய வாழ்வை மறந்து வாழும் வழக்கமான ஹீரோக்கள் போல ஆட்டோ ஒட்டுநர் தொழிலிலோ, காய்கறி விற்கும் தொழிலிலோ இறங்காமல் ஒரு பள்ளியில் நேர்மையான  NCC ஆசிரியராக பணியில் சேர்கிறார். இது துரை சிங்கத்துக்கு முன்னுரை.

 இப்போது கதையில் ஒரு சின்ன  ட்விஸ்ட். 'சிங்கம்' முதல் பாகத்தில் சொல்லியது போல  சூர்யா-அனுஷ்கா திருமணம் முன்பே நடந்திருக்கவில்லை.  திருமணமான பின் அனுஷ்கா கவர்ச்சியாக டூயட் ஆடினால் ரசிகர்கள் ஒத்து கொள்ள மாட்டார்கள் என இயக்குனர் ஹரி அவர்களின் திருமணத்தை இந்த படத்தில் ரத்து செய்து விடுகிறார். இதனை அனுஷ்கா நன்கு பயன்படுத்தி கொண்டு அவ்வப்போது வந்து சூர்யாவுடன் காதல் செய்து விட்டு போகிறார். கூடவே சூர்யா வேலை செய்யும் பள்ளியில் படிக்கும் ஹன்சிகாவும் சூர்யா மேல் காதல் கொள்கிறார். இது துரை சிங்கத்தின்  காதல் வாழ்க்கைக்கு முன்னுரை

இப்போது கதை

கதை ஒன்றும் புதிதோ, வித்தியாசமானதோ இல்லை. ஆசிரியர் வேலை செய்து கொண்டே ஆயுத கடத்தல் பற்றி  ரகசியமாக புலனாய்வு செய்கிறார் சூர்யா. ஆனால் இயக்குனர் ஹரியோ ஆயுத கடத்தலை காட்டினால் விடுதலை புலிகள், நக்சலைட்டுகள் என சர்ச்சை கிளப்புவார்கள் என்று முன்னெச்சரிக்கையாக ஆயுத கடத்தல் கும்பலை போதை மருந்து கடத்த செய்து விடுகிறார்.அதையும் திறமையாக கண்டு பிடித்து விடுகிறார் சூர்யா. பின்னர் அந்த கும்பலை வேட்டையாடுகிறார். 

திரைக்கதை

விறுவிறுப்பான திரைக்கதை என்பார்களே. விறுவிறுப்பு அதிகமானால் என்ன ஆகும் என்பதற்கு இந்த படம் ஒரு உதாரணம். படம் முழுக்க சூர்யா யாரையாவது துரத்தி கொண்டே இருக்கிறார் அல்லது அடித்து கொண்டே இருக்கிறார். நகரம், கடல், காடு, மலை என ஐந்து வகை நிலங்களிலும் சேசிங் செய்து ஒரு புது சாதனையே படைத்துள்ளார்

படம் ஆரம்பித்ததும் ஒரு  பாடல் , சண்டை காட்சி . பின்னர் ஒரு காதல் காட்சி, பின்னர் ஒரு சேசிங் காட்சி, பின்னர் சந்தானம் காமெடி, அதன் பின் மீண்டும் ஒரு சண்டை காட்சி, ஒரு டூயட் பாடல், பின் மீண்டும் ஒரு சேசிங், அதன் பின் ஒரு சண்டை, பின்னர் காமெடி, அதன் பின் ...... என்ன தலை சுற்றுகிறதா. விறுவிறுப்பாக படம் எடுக்கிறேன் என்று சூர்யாவை அரை மணி நேரம் ஓடவும், ஒரு மணி நேரம் சண்டை போடவும், அரை மணி நேரம் ஆக்ரோஷமாக வசனம் பேசவும் வைத்துள்ளார் ஹரி.

சூர்யா:

வழக்கப்படி தன் வேலையை கட்சிதமாக செய்துள்ளார்.  அதிரடி போலீசுக்கு தேவையான சிறந்த உடல் மொழி. ஆனால் அமைச்சர் முதல் அடியாள் வரை வரை முறை இல்லாமல் எல்லாரிடமும் ஆக்ரோஷ வசனம் பேசுவது ஓவர். என்ன செய்வது? சிங்கம் வேஷம் போட்டால் சீறித்தானே ஆக வேண்டும்.

மற்ற நட்சத்திரங்கள்:

2 கதாநாயகிகள், நான்கு வில்லன்கள், 2 காமெடியன்கள், நிறைய குண சித்திர நடிகர்கள் என நிறைய பேர் உள்ளனர்.  ஆனால் யாருமே மனதில் பதியவில்லை. யாரையுமே முழுமையாக பயன்படுத்தவில்லை.

இசை, கேமரா, எடிட்டிங் மற்ற தொழில் நுட்ப விஷயங்கள்:

பாடல் இசையோ, பின்னணிஇசையோ  சொல்லி கொள்ளும்படி இல்லை.

மற்ற தொழில் நுட்ப விஷயங்கள் பற்றி கருத்து கூற விரும்பவில்லை. காரணம் அவை பற்றி எனக்கு ஒன்றும் தெரியாது.

சர்ச்சை கிளம்ப  வாய்ப்புள்ள இடங்கள்:

1. ஆப்ரிக்க வில்லனை குரங்கு, அனிமல் என கண்டபடி இன வெறியோடு திட்டுகிறார் சூர்யா. எனவே ஆப்ரிக்காவில் இந்த படத்துக்கு எதிராக போராட்டம் நடக்க வாய்ப்பு உள்ளது.

2. போலீஸ் துறையில் நேர்மையற்றவர்களே அதிகம் உள்ளது போல் காட்டுகிறார்கள்.

3. ஹன்சிகாவுக்கு ஏற்படும் சோக முடிவும் தங்கள் மனதை புண்படுத்துவதாக அவரின் ரசிகர்கள் போராட்டம் நடத்தலாம்.

முடிவுரை:

முதல் பாகத்தை விட சிறப்பாக எடுக்க வேண்டும் என ஹரிக்கு நெருக்கடி. எனவே  சிங்கத்தின் வேகத்தையும், சீற்றத்தையும் அதிகமாக்க முயன்றுள்ளார். கடைசியில் சிங்கம் ரசிகர்கள் மேலே பாய்ந்து குதறி விட்டது. முதல் பாகத்துடன் ஒப்பிட்டால் இந்த படம் மிக சுமார். ஆனால் என்னதான் கால்கள் பழுதுபட்டாலும் சிங்கம் சிங்கம்தானே. அதிக எதிர்பார்ப்பு இல்லாமல் சென்றால் நிச்சயம் ஒரு முறை பார்க்க கூடிய படம்தான் இந்த சிங்கம் II

தீயா வேலை செய்யணும் குமாரு - கதை விவாதத்தின் கதை

"தீயா வேலை செய்யணும் குமாரு" படத்தை பற்றி சிலர் நல்ல விதமாக சொல்லி இருந்ததால் படம் பார்க்க சென்றிருந்தேன். படம் நான் எதிர்பார்த்த அளவு இல்லை. படம் பார்த்ததும் படத்தின் கதை விவாதம் பற்றி எனக்கு ஒரு எண்ணம் தோன்றியது. என்ன என்று நீங்களே பாருங்கள் என பாருங்கள்.

சுந்தர் C : பாய்ஸ்! நாம இப்போ ஒரு படம் பண்ண போறோம். நான் ஒரு கல் ஒரு கண்ணாடி படம் பாத்து இன்ஸ்பையர் ஆயிட்டேன். நாம அதே மாதிரி ஒரு கதை பண்ணனும்.

உதவி இயக்குனர் 1: அதுக்கென்ன சார்? அந்த படத்தையே திரும்ப எடுப்போம். யாராச்சும் கேட்டா ரீ மேக் அப்பிடிம்போம்

சுந்தர் C : அது தப்பு. அப்படியே எடுத்து ரசிகர்களை ஏமாத்த கூடாது.  . தொட்டதும் தெரியாம சுட்டதும் புரியாத மாதிரி நேக்கா  பண்ணனும்.

உதவி இயக்குனர் 1: லேசா புரியுது சார்.

சுந்தர் C :இப்போ OK OK படத்தை எடுத்துக்குவோம். ஹீரோ எல்லா ஃபிராட் வேலையும் செஞ்சு கடைசில ஹீரோயினை காதலிக்க வைக்கிறாரு . நம்ம படத்தோட ஒன் லைனும்  இதுதான் .

உதவி இயக்குனர் 2: சரி சார்

சுந்தர் C : OK OKல யாரு மெயின் ரோல் செஞ்சு இருப்பா?

உதவி இயக்குனர் 1 :  உதயநிதி, சந்தானம், ஹன்ஷிகா

சுந்தர் C :  இப்போ நாம எடுக்குற படத்துல சந்தானம், ஹன்ஷிகா இருக்காங்க உதயநிதி வேண்டாம். ஏன் சொல்றேன்னா உதயநிதியும் இருந்தா கதை நம்மதில்லைன்னு தெரிஞ்சுடும் . எப்பிடி?

உதவி இயக்குனர் 2:  சூப்பர் சார்! அனுபவஸ்தர் , அனுபவஸ்தர்தான் 

சுந்தர் C : இப்போ அடுத்து ஹீரோ பத்தி பேசலாம் . OK OKல ஹீரோ கேரக்டர் எப்பிடி?

உதவி இயக்குனர் 1: ஐயோ! பயங்கரமான ஃப்ராடு கேரக்டர் சார். வாயை திறந்தா பொய்தான். தெரு தெருவா பொம்பளை பின்னாடி சுத்தும். ஒரு வேலைக்கும் போகாது.

சுந்தர் C : அப்போ நம்ம ஹீரோ ஒரு அப்பாவி. பொண்ணுங்கன்னாலே பயம் . IT கம்பெனில வேலை பாக்குறாரு.

உதவி இயக்குனர்: கலக்கல் சார்!

 சுந்தர் C : OK OKல ஹீரோ குடும்பம் பத்தி சொல்லு 

உதவி இயக்குனர் 2: சின்ன குடும்பம் சார்! அப்பா, அம்மா, ஹீரோ இதுதான் அவங்க குடும்பம்.

 சுந்தர் C :இதை எப்படி மாத்தணும்னா ......

உதவி இயக்குனர் 1: சார் சார்! நானே சொல்றேன். நம்ம ஹீரோ வீட்ல அம்மா, அப்பா,அண்ணன், அக்கா, மச்சான், கொழுந்தியா இப்பிடி எல்லாம் இருக்காங்க. ஒரு கூட்டு குடும்பம்.

சுந்தர் C : இங்கதான் தப்பு பண்றீங்க. நம்ம ஹீரோ கூட்டு குடும்பத்துலதான் இருக்காரு. ஆனா அவருக்கு அம்மா,அப்பா  இல்லை.

உதவி இயக்குனர் 1: சாரி சார்!

சுந்தர் C : OK OK ல ஹீரோ லவ் பண்றது முதல்ல  சந்தானத்துக்கு பிடிக்காது. காதலை கெடுக்க பார்ப்பார் .பின்ன அவரே சேத்து வைக்க பார்ப்பார் . நம்ம கதைல இதை திருப்பி போட்டுப்போம். அதாவது சந்தானம் முதல்ல லவ்வுக்கு ஹெல்ப் பண்றாரு. ஃப்ராடுத்தனம் செய்ய ஐடியா தராரு . அப்புறம் அவரே கெடுக்க பாக்குறாரு.

உதவி இயக்குனர் 2: பின்னி பெடல் எடுக்கிறீங்க சார்! ஆனா சந்தானம் ஏன் அப்பிடி செய்றாரு?

சுந்தர் C :(மனதுக்குள்) அதான. ஏன் அப்பிடி செய்றாரு.

சுந்தர் C : எல்லாத்தையும் நானே சொன்னா நீங்க எதுக்கு. யோசிச்சு சொல்லுங்க.

உதவி இயக்குனர் 1: (சற்று நேரம் யோசித்து) பிடிச்சுட்டேன் சார்! சந்தானத்தோட தொழிலே  காதலை சேத்து வைக்கிறது.

 

சுந்தர் C : பிரிக்க காரணம்?

உதவி இயக்குனர் 2: சந்தானம் அவருக்கே தெரியாம தன்னோட தங்கச்சியவே லவ் பண்ண ஹீரோவுக்கு ஹெல்ப் செஞ்சுடறார் சார். அது தெரிஞ்ச அப்புறம் பிரிக்க பாக்குறார். ஓகே ஓகே ல வர மாதிரி  சந்தானத்துக்கு கை கூடாத காதலையும் வச்சுடுவோம்.

சுந்தர் C : சூப்பர்! நீங்க சீக்கிரமா டைரக்டர் ஆயிடுவீங்க.

 உதவி இயக்குனர் 2: தேங்க்ஸ் சார்.

சுந்தர் C: இப்போ ஹன்சிகா. இவங்களை ஹீரோ வேலை பாக்குற ஆபீஸ்லயே வேலை பாக்க வச்சுடுவோம். OK OK ல ஹன்சிகா அப்பா சென்னைல போலீஸ் கமிஷனர். நம்ம படத்துல ஹன்சிகா அப்பா சென்னைலயே இல்ல. நாகர்கோயில்ல வசிக்கிற ஒரு சாப்டான கேரக்டர்.

உதவி இயக்குனர் 1: இதுக்கு மேல நான் சொல்றேன் சார்! ஹன்சிகாவுக்கு பாத்த மாப்பிள்ளை கேரக்டர் ஒன்னு OK OK ல உண்டு. ரொம்ப சின்ன ரோல். நாம அந்த கேரக்டரையே நம்ம படத்துல டெவலப் பண்ணிக்கலாம் சார்.

 சுந்தர் C : குட்! நீங்க என்னையே மிஞ்சிடுவீங்க போல. இப்போ நாம புது கதை ரெடி செஞ்சுட்டோம். ஸ்க்ரீன் ப்ளே எழுதிடுங்க.

 உதவி இயக்குனர் 1: OK OK சார்

வெல்டன் "பரதேசி" பாலா

தூர்தர்ஷன் காலத்தில் ஒரு விளம்பரம் வரும். பி.டி. உஷா ஒரு மலைப்பிரதேசத்தில் ஓடி வருவார். அருகே ஒரு பெண் தேயிலை பறித்து கொண்டு இருப்பார். பி.டி. உஷா ஓடி முடித்ததும் கையில் ஒரு டீ கோப்பையை வைத்து கொண்டு "என்னை புத்துணர்ச்சியாகவைத்து இருப்பது கண்ணன்  தேவன் டீ" என்பார். தேயிலை தோட்டமும், தேயிலை பறிப்பதும் அவ்வளவு அழகாக காட்டப் பட்டு இருக்கும் அந்த விளம்பரத்தில். அந்த விளம்பரம் மனதில் ஏற்படுத்திய பிம்பத்தை அப்படியே கலைத்து விட்டது பாலாவின் "பரதேசி".

சுதந்திரத்தின் மதிப்பு அது நம் கையில் இருக்கும்போது தெரியாது. சிலர் வெள்ளையனே நம்மை ஆண்டு வந்து இருந்தால் நன்றாக இருக்கும் என கூறி கேட்டு இருக்கிறேன். அப்படி சொன்னவர்கள் தம் முடிவை இந்த படத்தை பார்த்தால் மாற்றி கொள்வார்கள். அந்த அளவு அடிமைத்தனத்தின் வலியை நமக்கு உணர வைக்கிறது படம். படத்தில் நடித்தவர்கள் யாரையும் நடிகர்களாக நினைக்க முடியவில்லை. உண்மையிலேயே அந்த கிராமத்திற்கு சென்று காமெராவை ஒழித்து வைத்து அந்த மக்களை இயல்பாக படம் எடுத்தது போல தோன்றுகிறது.  இந்த மாதிரி ஒரு கதையை கையாள பாலாவினாலேயே முடியும். குறிப்பாக மூளை சலவை செய்து  மத மாற்றம் செய்ததையும், செய்து கொண்டு இருப்பதையும் காட்டிய துணிச்சல் பாராட்ட பட வேண்டியது.

அதே போல படத்தின் பின்னணி இசையும், பாடல்களும் அற்புதம். பாடல் வரிகளிலேயே கதை சொல்லி இருக்கின்றனர். சில நேரங்களில் இசை G.V.பிரகாஷா இல்லை இளையராஜாவா என சந்தேகம் வருகின்றது. 

"அங்காடி தெரு"விலேயே அடிமைத்தனத்தை காட்டி விட்டார்களே என சிலர் கேட்கின்றனர். "அங்காடி தெரு" அடிமைகளுக்கு தப்பி செல்ல வாய்ப்பு இருந்தது. அவர்களுக்காக வாதாடவும் மனித உரிமை அமைப்புகள் இருக்கின்றன . ஆனால் இந்த "பரதேசி "களை நினைத்து கவலைப்பட சம காலத்தில்  யாருமே இல்லை. அதனாலேயே முழு கொத்தடிமைகளாக வாழ்ந்த  "பரதேசிகள்" அதிக அளவு பாதிப்பு ஏற்படுத்துகின்றனர் .

படத்தின் நாயகன் போல, இந்த காலத்திலும் தன் "கங்காணி" மேனேஜரை நியாயமாராக நம்பி பின் அப்ரைசல் வந்த பின் "எல்லாம் பாலிடிக்ஸ்ங்க" என்று  புலம்பும் கார்ப்ரேட்காரர்களும்  இந்த படம் பார்க்கலாம். தாம் ஏமாற்றப்  படுவதெல்லாம்  ஒன்றுமே இல்லை என புரிந்து கொள்வீர்கள் . 

ஒரு சில குறைகள் இருந்தாலும் அடிமை வாழ்க்கையை நம்மை உணர வைத்ததில் பாலா முழு வெற்றி அடைந்து இருக்கிறார். இவ்வளவு நாட்களாக தன் கதை நாயகனை மட்டும் விசித்திர பிறவியாக படைத்து படம் எடுத்ததை   மாற்றி , ஒரு  சமூகம்  அடைந்த பாதிப்பை சொல்லி இருக்கும் பாலா இதே போக்கை தொடருவார் என நம்புவோம். தமிழில் இப்படி ஒரு படத்தை கொடுத்ததற்காக  பாலாவிற்கு ஒரு வெல்டன்.

வத்திக்குச்சி - சினிமா பார்வை

பரிந்துரை : ஒரு முறை பார்க்கலாம்.

காமெடி-த்ரில்லர் என எதாவது சினிமா வகை உண்டா ? அதை இந்த படத்தில் முயற்சி செய்து இருக்கிறார்கள் என தோன்றுகிறது . குறிப்பாக கடைசி காட்சியில் தியேட்டரே சிரிக்கிறது. 

ஷேர்-ஆட்டோ ஓட்டும் நம் கதாநாயகன் அஞ்சலியை காதலிக்கிறார். அது போக மீத நேரத்தில்  முகம் தெரியாதவர்களுக்கு எல்லாம் உதவி செய்கிறார். அதனால் அவரை கொல்ல சிலர் முயல்கின்றனர். அதலிருந்து எப்படி தப்பி வருகிறார் என்பதை த்ரில்லர் போல சொல்ல முயன்று இருக்கின்றனர். ஆனால் வலிமையான காரணமோ, காட்சிகளோ இன்றி காமெடி படமோ என்று சந்தேகம் வருகிறது.

ஒருவனை கொல்ல ஏன் எல்லாரும் முயற்சி செய்கின்றனர் என்பதாக  ஆரம்பித்து படம் நன்றாகவே போகின்றது. அழகான காட்சிகள், சின்ன சின்ன காமெடிகள், சிறப்பான வசனங்கள் , அஞ்சலியின் நடிப்பு என எல்லாமே படத்திற்கு உதவி இருக்கிறது. ஆனால் நாயகனை கொலை செய்ய வருபவர்கள் சொல்லும் காரணம் ஒன்று கூட நம்பும்படி இல்லை.  படத்தில்  அஞ்சலியே இந்த காரணங்கள் எதையும் நம்பவில்லை என்றால் பார்த்து கொள்ளுங்கள். நடுத்தெருவில் கழுத்தில் கத்தி வைத்து பணம் பிடுங்குவது, கொலை செய்யும் திட்டத்தை டீ கடை முன் வைத்து விவாதிப்பது போன்ற காட்சிகள்  எல்லாம் ஓவர். குறிப்பாக கடைசி காட்சியில் இயக்குனரின் புத்திசாலித்தனத்தை பாராட்ட வார்த்தையே இல்லை. கதாநாயகனை புத்திசாலியாக காட்ட முயன்று கோமாளியாக காட்டி இருக்கிறார்.

ஆனால்  படம் குப்பை என்றல்லாம் சொல்ல முடியாது. நிச்சயம் பிழைத்து விடும். இயக்குனர் இப்போதைக்கு ஜஸ்ட் பாஸ்தான் ஆகி இருக்கிறார். கதைக்கு இன்னும்   கொஞ்சம் மெனக்கெட்டு இருந்தால் ஒரு அதிரடி திரில்லர் உருவாக்கி இருக்கலாம். அடுத்த படத்தில்  இன்னும் நன்றாக செய்வார் என நம்புவோம்.

விமர்சனங்கள் வரவேற்கப்படுகின்றன